《將軍澳海旁-戀上台灣料理💕》
將軍澳海旁嘅台式料理已經去過3-4次，平日人流都幾多。第一次去我地都出文寫過係失望👉🏻👈🏻，但今次食物就好似係去咁多次以嚟最啱我哋口味嘅一次。所以話呢，去餐廳叫啱嘢食真係好緊要😌。
.
📍香菜爆芝雞扒（$68）
雞卷有兩大件，份量夠晒澎湃😍。切開見到中間釀入芝士🧀，旁邊配上香菜醬同芫荽🌿。外皮香脆，中間雞肉嫰滑多汁🐓，加上芝士更加惹味，不過香菜發揮唔大存在感太低。記得一定要同朋友share唔係會好膩嫁😚🤟。
.
📍戀上生煎包（$28/4隻）
雖然餐牌寫係生煎包，不過其實應該叫做韭菜盒子會適合啲💚。用咗平日嘅餃子皮包住韮菜同肉碎，個皮食落煙韌，中間韭菜味幾香不過就煎得比較油膩。
.
📍特色手工餃（$48/6隻）
餃子皮實在太厚😭，而中間肉碎又唔係突出，雖然肉汁唔少不過味道麻麻地，可以skip。
.
📍台式紅燒牛肉麵（$78）
牛肉麵揀咗古早味，湯底食落好香藥材，再加上芫荽味真係幾正💚。刀削麵煙韌厚身🍜，牛肉軟腍入味🐂，加上肉量真係好多好慷慨，呢個牛肉麵好抵食👍🏻。
.
📍台式滷水溏心蛋（$38）
溏心蛋睇落好唔錯🐣，可惜蛋味同滷水味都不足，以呢個價錢真係太過進取，可以唔使叫。
.
📍雪崩珍珠朱古力（$38）
非常推薦呢杯飲品，唔單止望落有睇頭😍，味道都好唔錯。最上層嘅奶蓋加有Oreo碎，搞勻後飲落去似朱古力奶🍫，味道濃郁但又唔會過甜，一啲都唔膩🤟🏻。另外仲配有煙韌嘅珍珠，真係冇得輸。
.
戀上台式料理
將軍澳唐俊街21號翩匯坊地下G26號舖
Search